كلمات قصيدة الحب في البياع حرام فارس قطريه
مش عيب يا حلو اميزك
واديك عينيا واعززك.
وارضيك واشيلك لو تُقع
وان يوم تميل اجري انقذك
وافضل معاك واقبل عيوب
واستر عليك علشان تتوب
ايام ما كان بيتك قزاز
انا عمري ما حدفتك بـ طوب
واول ما تكبر.
يبقي انا اللي تخيب عليه
وتتقل عليه
دا انا قلبي كان فارد ايديه
وعشان عينيك يدخل حروب
غلطان انا، ويابن الاصول
الحب في البياع حرام
لا يجوز اروح اطلب ونس
من ناس ماتفهمش الغرام
ان كانلي حق في قصتك
فـ سامحت فيه ومبروك عليك
واظن انا اديتك حقوقك
قبل ما تروح بالجرام
يبقالي عندك كام جميل
وملكش عندي الا الوداع !
دي نهاية لايقة لحد زيك
اشتريته وهو باع
احنا ناس فاهمين اصول
والي يجي يدق بابنا
بنراضي ونمشي بادبنا
وراسنا فوق زي السِباع
الحب دا بتاع ناس.
بتعرف تبقي جمبك للنهاية !
ناس مخفش عليا منهم
واما اقول الـ اه، معايا
اللي بيروح مش حبيبك
اللي بيحبك هيفضل
والبقاء لـ الاوفي ديما من البداية
يكفيني بس اقفل عينيا
وقلبي مظلمش واذي !
ولا قال في حد كلام غلط
واغتاب وجاب سيرة كذا ..
يكفيني اعيش وانا بوجعك
بسكوتي عن كل اللي فات
ولا عاوز اشوفك في الحياة
ولا حتي تحضرلي العزا !
واديني سايبك ليا فيك
ومعلمك ومكبرك..
خسرتني سنين اما انا
كان قربي خير مش خسرك!
انا اول اللي ادوك كتير
وان كنت ناسي افكرك
واما لقيت غيري افتريت
واهو بكرا غيري يعورك
انا همشي وانا واخد معايا
عزة النفس اللي فيا !
وانا مش حزين عندي يقين
هتلف وهترجع عليا ..
هتشوف بعينك سبت اية
علشان تقابل بعده ايه
وساعتها هضحكلك ، واقول
كان فيه وخلص كان من عينيا
اديني سبب ازعل عليه
ان انت روحت وسيبتني
ولا كان في طبعك شئ عدل
بالعكس دا انت تعبتني .
جات من النصيب !
خلص امور وردم بحور ونهي الصداع
ولقيت في بعدك ربنا
طبطب عليا وشدني
خليك مع اللي يغفلك
وارتاح معاه واضحك كمان.
خليه يسقفلك وزيد.
من اللي انت فيه واظهر وبان
في ناس بتمشي في الحياة
وترتاح مع اللي يغشها
وانا ماشي ادور في الحياة
عن ناس تحسسني الامان
اللي سابنا يرد بابنا !
ونشرب الشاي بعده عادي
احنا مبنخسرش حد
احنا مبنقطعش ود
احنا لما بنبني حاجة
وحد تاني يروح يهد
بنبني تاني.
وعجبي !
Comments
Post a Comment