كلمات قصيدة الحمد لله فارس قطريه

يجوز كل اللي ضاع منك

مكنش يليق عليك يا جميل

كل شعور وكل حبيب 

وكل صديق ووقت تقيل 

يجوز الماضي كان تعبك 

وبيلاعبك وبيهدك 

عشان لما العوض ييجي 

تحس بفرحة التفاصيل 

اكيد ربك له حكمة عشان

يزيد الحمل علي ضهرك

وزي ما زاد عليك الحمل

خلقلك كتف صعب يميل 

مفيش واحد ضميرة سليم

بيفضل يتكسر علطول

بيتعب اه ويزعل اه 

ويجي اليوم وزعله يزول

يدوق من اللي اتحرم منه 

ويرجعله اللي ضاع منه 

وزي ما عاش سنين يصبر 

يعيش نفس السنين بينول 

مدام ماذيتش بني ادمين

ولا في قلبك سواد من حد

وبتراضي اللي بيجيلك

وتطلع شهم وقت الجد

متشغلش الدماغ بالناس

ورب الناس معاك اصلاً

تاكد ان زرع الخير

بيطرح في النهاية الورد

يجوز تزعل وتتعكنن من الدنيا وبلاويها

بجوز تشعر بانك ضيف ملكش مكان في وسطيها

يجوز ياذوك وياجو عليك لحد ماتبقي مش طايق

وفجاة تلاقي خير جايلك يرد الروح ويحيها

قالتلي امي زمان وانا طفل

لو صحابك اذوك امشي

سمعت كلامها واما مشيت

لقيتهم جولي بعديها

وهي الدنيا مستاهلة مناهدة وشد في الاعصاب

جينا الدنيا واحنا ضيوف وهنودعها برضو اغراب

تعيش بارد تموت مرتاح، لو ركزت تتجن 

كفاية كلام عن الخاينين وعن غدر اللي كانو صحاب

هتلقي صحاب وناس حلوة

تشدك من اللي شفته زمان

هتلقي حبيب وناس جدعان 

هتتفرج علي الايام 

وتضحك علي عدا عليك 

وتحمد ربنا انه اداك 

عوض يراضيك الحرمان 

ربنا عادل وكريم ورحيم 

وبيسمع ويشوف ويحاسب

لو فاكر ان ملكش سند

ربنا يا عبيط سند الغلبان 

انا كنت بقول ان انا مظلوم 

ومليش في الدنيا نصيب افراح

الناس كلها واخدة الارزاق

وانا رزقي عياط وزعل وجراح

ادتني الايام علي وشي

سنتين تلاتة وعشىرة كتير

وفي ثانية لقيتها بتتبدل

والدنيا بتقلب بيا براح

الحمدلله اجمل كلمة علي كل الخير او كل الضر

الحمدلله علي كل الجاي والحمد لله علي كل ما مر

كلمة بسيطة مفعولها كبير وان صدقتها ترضي وترتاح

لو كانت كل الدنيا عليك تسترها عليك وترد الشر 

اصبر واحتسب صبرك واحمد قد ما تعاني

وقول بينك وبين نفسك خلقني ومش هينساني

قول يارب انا راضي وشاكر فضلك الموصول 

رجائي فيك لا يبلي اللي أن تبلي احزاني