كلمات قصيدة وصيتي للشخص اللي مكمل فارس قطريه

 طمني بوجودك

لو كنت بتعزني

امسك ايديا عشان

قبلك كتير هدّني

قول إني شخص جميل

حتي لو معكش دليل

خليك معايا أصيل

إن يوم أغيب ودّني.

الدنيا مش سهلة

فبلاش نزدها حمول

هو الكلام بفلوس؟

قول إني طيب قول

أنا حزني 

ده بيزول من كلمة واللّٰه

جبر الخواطر سهل

علي القلب لي مفعول.

في كلمة بتداوي

وفي كلمة بتعور

في ناس بتطفينا

 يجي غيرها وينور.

انا شوفت حزن كتير

وقابلت خلق كتير.

ومشيت في ناس مشاوير

وعرفت بلاويهم

الناس هتحترمك

لو عشت دور الندل

وهيقتلوك بالدور

لو عشت تديهم.

خليك ومتسبنيش

زي اللي كان قبلك

أنا عندي قلب كبير

وحنانه متساب لك

لو كنت غيرهم بس طمنتني بحاجة

هديك عينيا بطوع

وحياتي تحسب لك.

انا ياما دُقت جروح

فبلاش تزيد واحد

انا نفسي بس نكون

اتنين بروح واحد

اكبر طموحي بسيط

أنا نفسي متسبنيش

وإن زاد خصامنا كتير

متكونش فيه جاحد.

أنا جايز ساعات أبقي.

إنسان غريب إلأطوار

بس اللي ايده في التلج

غير اللي ايده في النار

أوقات بخاف من الناس

فساعتها طمني

امشي لي لو خطوة

هرمح عليك مشوار.

صدقني

لما الناس بالكدب ترميني

الكل يقتلني

الاقيك بتحيني

إن عري جرحي الزمن وكشفني للأيام

أجري عليك فأيديك تغطيني.

خلي الخصام ليّن

خلي الجفا حنين

مش عيب في يوم تزعل

العيب أمون هيّن

ميزني عن غيري

وساعتها هبقي لك

أيام بتحلي لك

وأيادي بتزين.

أنا ياما دُقت مرار

لو دقته من تاني

بلاش يكون بأيديك

لو دق بينا الزعل

خليها مرة عليا

ومرة تانية عليك

أنا قد أكون حساس

وخنيق ومتشائم

بس إن طلبت العين

أوهبها لاجل عينيك.

أنا مش رومانسي صحيح

ولا بعرف أتغازل

عن قلبي وكرامتي أنا عمري ما أتنازل

لكن لو استكفيت بوجودي عن غيري

هبقي لك المأوي الأولي والأذل.